GENERAL SANTOS CITY – Gibag-o sa Department of Foreign Affairs Regional Consular Office sa Gensan ang ilang oras sa pag-asikaso sa mga walk- in client aron dili na malisdan ang mga nagproseso sa ilang pasaporte.
Sumala ni Daniel Te, OIC regional director sa DFA -Gensan, nga sugod Pebrero 1, gikan alas dos hangtud alas singko sa hapon na ang ilang pag-asikaso sa mga walk-in client, o kadtong mga gaadto sa DFA nga walay online appointment.
Wala na usay ginahimong pagpanghatag og priority number sa buntag hinungdan nga dili na kinahanglang mupila atubang sa Robinsons Place sa kaadlawon pa lamang aron makauna sa pila.
Gidugang ni Te, nagpatuman sila og first-come-first-served policy sa paghatag og priority number nga ipanghatag nila gikan alas-2 hangtud alas-5 usab.
Siento singkwenta ka kliyente sa passport processing ang quota sa DFA-Gensan matag adlaw. Gihingusgan pa sa opisyal nga inay nga mupila sa DFA isip walk-in client, gamiton ang online registration sa DFA.
Mubisita lamang sa www.passport.gov.ph aron magparehistro sa online appointment.
Mas sayon kini sumala pa ni Te, tungod 300 kliyente ang ilang quota matag adlaw ug makatakda pa sila og adlaw og oras sa pag-adto sa DFA-Gensan alang sa pagproseso og papeles.
Walay bayad ang online registration sa DFA.
