Gipasiugda sa National Bureau of Investigation nga responsibilidad sa Senado ang pagpresentar kang Senator Ronald “Bato” dela Rosa tungod kay anaa kini ubos sa ilang protective custody.
Sumala kang NBI Director Melvin Matibag, klaro ang responsibilidad sa taas nga kapulungan sa pagpatungha sa magbabalaod nga adunay giatubang nga warrant of arrest.
Dungan niini, gipahayag ni Matibag nga nagpagawas na og direktiba si Pangulong Ferdinand “Bongbong” Marcos Jr. ngadto sa mga ahensya sa gobyerno.
Gimando sa Pangulo nga siguruhon ang patas nga dagan sa imbestigasyon ug papanubagon ang tanang indibidwal nga mapamatud-ang adunay sala sa insidente.
Gibutyag usab ni Matibag nga kon tinuod nga wala na sa sulod sa Senado si Dela Rosa, kini makadismaya.
Matod ni Matibag, “makasubo” ang nahitabo tungod kay naglaom siya nga respetuhon ang ilang sabot. Nagtuo usab siya nga isip mga tinahod nga opisyal, katungdanan sa mga senador nga panalipdan dili lamang ang ilang kauban kondili usab ang mga balaod ug ang Konstitusyon.
Giangkon usab sa direktor nga adunay pagbati ang mga ahente sa NBI nga posibleng “staged” o gituyo lamang ang kagubot nga nahitabo sa Senado aron mahatagan og higayon nga makagawas ang senador.
Gipasiugda niya nga ang ilang mandato mao ang pagsiguro nga madakpan ang bisan kinsa nga adunay warrant of arrest, ilabi na nga unom na ka bulan matodpa nga nagtago ang senador sukad migawas ang balita mahitungod sa iyang pag-aresto.
Bisan pa niini, gitugyan na sa NBI sa Department of Justice (DOJ) ang sunod nga desisyon ug paghukom sa kaso tungod kay sila ang nag-unang ahensya nga nangulo sa maong operasyon.
