GENSAN- Gipahayag ni Attorney Arturo Cloma ang iyang kabalaka kalabot sa giingong dinalidali ug malisyosong pagpatuman sa warrant of arrest gikan sa International Criminal Court (ICC) batok kang Senador Ronald “Bato” Dela Rosa.
Samtang gipasabot niya nga angay unang hulaton ang pinal nga desisyon sa Korte Suprema mahitungod sa hurisdiksyon niini sa nasod.
Sumala pa ni Cloma, ang judicial system sa Pilipinas nagpabiling lig-on ug “complementary” lamang ang papel sa ICC, busa kinahanglan ang pagrespeto sa proseso sa balaod ilabi na nga duna nay giduso nga petisyon ang kampo ni Dela Rosa ngadto sa kinatas-ang hukmanan.
Gipasidan-an usab sa maong abogado nga ang paggamit sa mga ahensya sa gobyerno alang sa politikanhong interes o “political vendetta” makamugna lamang og kagubot ug dili maayong tan-awon sa publiko.
