GENERAL SANTOS CITY – Naapil ang negosyo sa pipila ka mga prominenteng businessmen dinhi sa siyudad sa gipagawas nga freeze order sa sixth division sa Court of Appeals batok sa mga bank assets ni Joel Apolinario, ang founder sa Kabus Padatuon o KAPA Community Ministry International Inc.
Base sa resolusyon nga gipagawas sa CA nga may petsa nga June 4, 2019, kung asa mibarog nga petitioner ang Anti-Money Laundering Council (AMLC) pinaagi sa Office of the Solicitor General base sa section 10 sa Republic Act 9160, gimando ang pag-freeze sa kapin 40 ka bank accounts sa nagkalain-laing bangko sa nasud.
Napulo niini ang nakapangalan mismo kang Joel Apolinario, samtang mas daghan ang nakapangalan sa asawa niini nga si Reyna Apolinario apil na ang pipila ka mga negosyo, ug sa mga paryente, ug aduna usay mga panag-iya sa mga iladong negosyante sa siyudad.
Kahibaluan nga kagahapon sa hapon gisulod sa mga ginsakpan sa National Bureau of Investigation (NBI) ang panimalay ni Apolinario sa Brgy City Heights ning dakbayan.
Dungan kini sa gipahigayong synchronized nga raid sa ahensya sa mga KAPA offices sa pipila ka bahin sa nasud.
Base kini sa search warrant nga gipagawas ni Manila Regional Trial Court (RTC) Branch 20 Judge Marivic Umali batok sa nasampit nga investment scam, kalabot sa pagsupak matud pa sa KAPA sa Securities Regulation Code.
Samtang, wala naabtan sa mga otoridad sa iyang panimalay si Apolinario nga gikaingon nga atua sa Cebu karon, base sa mga report.
Samtang, gawas sa KAPA, apil usab nga gi-raid sa NBI-Sardo ang buhatan sa ALMAMICO o Alabel-Maasim Small Scale Mining Cooperative nga karon ALAMCCO na kon Alabel-Maasim Credit Cooperative.
