Nipasalig ang Philippine Coast Guard (PCG) ug ang Bureau of Fisheries and Aquatic Resources (BFAR) nga di sila magduhaduha bisan pa sa kaagresibo sa China sa West Philippine Sea.
Matud pa ni PCG Spokesperson for West Philippine Sea Commodore Jay Tarriela, ang ilang ahensya ug ang BFAR padayon nga nagpakita sa ilang lig-on nga pasalig sa pagpanalipod sa mga Pilipinong mangingisda sa Kalayaan Island Group, bisan pa sa agresibong pagpanghasi ug mga hulga sa mga barko sa China sa kadagatan sa Isla sa Pag-asa.
Gipasalig ni Tarriela nga bisan pa sa mga taktika sa pagpanghulga ug agresibong aksyon, nagpabiling lig-on ang PCG ug BFAR.
Siya niingon nga dili sila mosibog o matarog, tungod kay ang ilang presensya sa Kalayaan Island Group mahinungdanon sa pagdepensa sa katungod ug panginabuhian sa mga mangingisda nga Pilipino.
Si Tarriela nihimo niini nga pamahayag human ang usa ka barko sa China Coast Guard (CCG) nagpabuto og water cannon ug pagkahuman gituyo nga midasmag sa barko sa Philippine Coast Guard (PCG) sulod sa kadagatan sa Pag-asa Island niadtong Domingo sa buntag.
Matod ni Tarriela, nahitabo ang insidente samtang luwas nga midunggo sa kadagatan sa Pag-asa Island ang tulo ka mga barko sa Bureau of Fisheries and Aquatic Resources (BFAR), lakip ang BRP Datu Pagbuaya.
Anaa sila aron paghatag og proteksyon sa mga mangingisda nga Pilipino isip kabahin sa programang “Kadiwa para sa Bagong Bayaning Mangingisda” (KBBM).
Sa iyang post sa social media, gikompirmar ni Tarriela nga karong buntaga, ang mga barko sa BFAR nag-atubang sa mga delikado ug provocative nga maniobra sa China Coast Guard ug Chinese Maritime Militia.
Sa pamahayag ni Tarriela, mga alas 8:15 sa buntag, delikado nga miduol ang mga barko sa China ug gipabuthan og water cannon ang mga barko sa BFAR, klarong hulga.
Nisamot pa ang tensiyon pasado alas 9:15 sa buntag dihang ang usa ka barko sa CCG nga adunay bow number 21559 deretsong nagpabuto og water cannon sa BRP Datu Pagbuaya hinungdan sa pagkaigo niini.
Tulo ka minutos ang milabay, ang maong barko sa CCG giingong gituyo nga midasmag sa ulin sa Datu Pagbuaya.
Ang pagbangga nakuhaan sa video ug hinungdan sa gamay nga kadaot sa istruktura sa barko, apan wala’y nasamdan sa mga tripulante.
