Nakaplagan ang patay’ng lawas sa usa ka 35-anyos nga lalaki sulod sa bunkhouse sa mga tighimo og hollow blocks sa Purok 1, Barangay San Carlos, Valencia City niadtong milabayng adlaw, alas 2:20 sa hapon.
Sumala sa taho, daling miresponde ang kapulisan human madawat ang report, ug sa ilang pag-abot sa lugar, nakita nga naka-lock ang pultahan gikan sa sulod samtang namaho na ang palibot.
Tungod niini, gisudlan ang lugar uban ang pagtugot sa tag-iya ug didto ilang nadiskobrehan ang biktima nga naghigda ug anaa na sa state of decomposition.
Matod pa sa inisyal nga imbestigasyon, katapusang nakit-an nga buhi ang biktima niadtong Abril 6 ug sa pagkakaron walay nakitang timailhan sa foul play.
Bisan pa niini, padayon gihapon ang lawom nga imbestigasyon aron matino ang hinungdan sa kamatayon, samtang ang patay’ng lawas gidala na sa Villanueva Funeral Homes alang sa dugang eksaminasyon.
