Nagpadayon ang kampo ni Veronica “Kitty” Duterte sa pagpangayo sa Korte Suprema nga aksyunan dayon ang mga pending pa nga petisyon nga nag-awhag sa pagpauli sa Pilipinas ni kanhing President Rodrigo Duterte gikan sa kustodiya sa International Criminal Court.
Sa usa ka 13-pahina nga “motion to resolve,” giingon ni Kitty nga kapin 14 ka bulan na nga wala pa aksyuni ang kaso sa Korte Suprema, ug kapin unom ka bulan na sukad sa ilang unang urgent motion.
Matod niya, ang padayon nga dili paglihok sa Korte Suprema makadaot sa kagawasan nga ginasiguro sa hudikatura ug mahimong hinungdan sa pagkawala sa pagsalig sa publiko sa sistema sa hustisya.
Sa lahi nga petisyon, gihangyo usab nila Kitty, Davao City Mayor Sebastian “Baste” Duterte, ug Davao City 1st District Rep. Paolo “Pulong” Duterte nga ipauli ang kanhing Presidente ug ipakita siya sa mga awtoridad sa Pilipinas.
Gikutlo usab ni Kitty ang usa ka resolusyon sa Senado nga matod niya nagsuporta sa pagpanalipod sa mga Pilipino batok sa giingong ilegal nga pag-aresto o “extrajudicial rendition” sa iyang amahan.
Si kanhing Presidente Duterte naaresto niadtong Marso 2025 base sa warrant sa ICC may kalabotan sa kaso nga crimes against humanity tungod sa giingong mga pagpamatay sa ilawom sa iyang kampanya batok droga.
Sa karon, siya nagpabilin nga nakakulong sa The Hague, Netherlands alang sa umaabot nga pagdungog sa Pre-Trial Chamber.
