GENERAL SANTOS CITY – Positibo si Fr. Raul Valle sa Vicar Priest sa Brgy Lagao, sa pag-imbita ang mga religous sectors sa pagpahigayon ug Oplan Tokhang sa Philippine National Police.
Matud pa ni Fr. Valle, alang kaniya maayo ang naasoy’ng programa isip kabahin sa kampanya aron masumpo ang problema sa iligal nga droga.
Ug ang pag-imbita matud pa kanila ang alang sa transparency, hilabi na nga sa unang hugna sa Oplan Tokhang, giakusahan ang kapulisan sa mitaas nga ihap sa kamatay nga gikonsidera sa uban nga extra-judicial killings.
Apan alang kaniya, dili matud pa kinahanglang ang mga pari mismo ang muadto, hilabi na nga dugay na matud pang gapahigayon ang simbahan ug mga lakang aron maawhag ang katawhan nga dili malambigit sa iligal nga droga, sa tumong nga makatabang sa pagsumpo sa iligal nga droga.
Apan sa sugyot nga may muuban nga mga taga-simbahan sa pagpahigayon ug Oplan Tokhang, maayo matud pang magpadala lang ug representante gikan sa simbahan sama sa mga sakop sa parokya sama sa mga kusgan pa nga retired police o kaha magtutudlo nga migahin usab sa ilang kinabuhi sa pagpangalagad sa Ginoo.
