GENERAL SANTOS CITY – Mapasalamaton ug nadasig ang mga pamilya sa mga biktima sa Maguindanao Massacre.
Kini human sa gihimong pagpahigayon ug misa ug pagdagkot ug kandila sa mga sakop sa media sa pagpanguna sa Kapisanan ng mga Brodkaster ng Pilipinas (KBP-Soccsksargen chapter) sa gilubngan sa mga biktima sa Forest Lake Cemetery dinhi sa dakbayan, kagahapong adlawa, dungan sa pagsaulog sa All Souls Day.
Matud kang Grace Morales, misis ni Russel Morales nga usa sa napatay nga mga mamahayag sa naasoy’ng mangilngig nga krimen, sa ilang naandan, petsa 23 pa silang gatapok nga mga pamilya sa mga biktima, dungan sa anibersaryo niini.
Hinungdan nga bisan ug naluya na matud pa sila tungod sa hinay nga dagan sa kaso nga daw sa napasagdan na ug wala nay update, nadasig sila nga magpadayon sa pakigbisog ug paglaum nga makab-ot ra gihapon ang hustisya.
Kini hilabi na human makita nga may mga kaubanan ug sakop gihapon sa media nga nakighiusa ug gasuporta kanila sa paghandom sa pagkab-ot sa kaso.
Samtang, galaum usab sila karon nga makatabang karon sa dagan sa kaso ang pagkatuboy sa kanhi nilang abugado nga si Atty Harry Roque isip bag-ong presidential spokesperson, gumikan mas duol na kini kang Pangulong Rodrigo Duterte.
Kabahin usab sa umaabot nga paghinumdum sa ikawalong anibersaryo sa mangilngig nga masaker sa November 23, sabutan matud pa nila sa ubang mga pamilya ang mga ipahigayon nga aktibidad.
Apan posibleng musaka gihapon matud pa sila sa site didto sa Sitio Masalay, Salman, Ampatuan, Maguindanao.
