GENERAL SANTOS CITY – Hustisya ang singgit sa pamilya sa tricycle driver ug sa pasahero niining 6 anyos nga napagan sa pagpamusil nga natigayon kagahapon sa Fil-Am Road, Barangay Fatima, GenSan.
Sila nanghinaot nga unta sa mas daling panahon, matumbok ang motibo ug ang responsable sa maong krimen.
Sa karon, naghimo na ug makuting imbistigasyon ang kapulisan aron matumbok ang motibo ug ang suspek sa krimen.
Kahinumduman nga patay sa pagpamusil silang Dante Abdulasis Macasalong, tricycle driver, legal age, residente sa Olarte Vill, Barangay Labangal samtang patay usab ang 6 anyos nga batang babaye nga si Alias Precious human nga nadamay sa insidente.
Nasuta nga gikan sa sentrong bahin sa syudad ang tricycle sa biktima padulong sa Barangay Fatima sakay ang 3 ka babayeng pasahero nga susamang anaa sa legal age ug duha ka menor de edad nga kaluha.
Pag abot sa Fil-Am Road, kalit lang kining gitaparan sa suspetsadong nakamotorsiklo dayon gipusil ang traysikel driver nga biktima tulo ka higayon.
Daling gidala sa ospital ang mga biktima apan gideklarang dead on arrival ang tricycle driver ug ang menor de edad nga si Alias Precious.
