“Nakapanghihinayang” Mao kana ang pamahayag ni Atty. Rogelio Garcia, Regional President sa PDP-Laban, human sa pag-resign ni Atty. Nicholas Kaufman isip lead counsel ni kanhi Presidente Rodrigo Duterte sa kaso nga iyang giatubang sa International Criminal Court (ICC).
Sumala ni Garcia, ang pag-resign ni Kaufman mahimong may kalabutan sa kontrata. Apan, matod niya nga makapasubo kini tungod kay giingon nga namemorya na sa abogado ang kurso ug mga detalye sa kaso.
Bisan pa niini, nagtuo si Garcia nga ang kampo ni Duterte nasayod kung unsa ang labing maayo alang sa ilang legal nga depensa.
Base sa gipagawas nga dokumento sa ICC, si Kaufman miingon nga si Duterte mismo ang nakahukom nga mokuha og bag-ong abogado isip kabahin sa re-organisasyon sa iyang defense team samtang nagkaduol ang trial phase sa kaso.
Gikumpirma usab ni Kaufman nga natapos ang iyang kontrata kaniadtong Marso 31, 2026.
Bisan pa sa iyang pagbiya, gipasalig ni Kaufman nga ang legal nga representasyon ni Duterte magpabilin nga lig-on uban sa tabang sa bag-ong counsel nga adunay halapad nga kasinatian sa ICC.
Ang sunod nga status conference sa kaso gikatakda sa Mayo 27 samtang nagpadayon ang mga pagpangandam alang sa husay.
