Gisupak ni Political Science Professor Dennis Coronacion pahayag ni Robin Padilla nga plano sa ilang mga pro-Duterte nga senador nga babagan ang pag-convene sa Senado isip Impeachment Court kung mapasa na ang Articles of Impeachment batok kang VP Sara Duterte.
Matud ni Coronacion, supak sa Konstitusyon ang maong plano.
Gipasabot sa political analyst nga mandato sa Senado ang dayong pag-convene isip impeachment court sa higayon nga madawat na niini ang Articles of Impeachment.
Wala matod pay laing mahimo ang taas nga konseho kon mag-convene tungod kay kabahin kini sa ilang trabaho, subay sa gimando sa Konstitusyon ug usa sa ilang non-legislative powers.
Sigurado usab siya nga daghang Pilipino ang naglaom nga mahitabo ug ipatuman kini ubos sa kasamtangang liderato.
Bisan pa niini, nagtuo si Coronacion nga dili lamang mosupak ang minority sa pag-constitute sa Senado isip impeachment court, kondili posible usab nga mobotar sila batok sa conviction ni VP Sara.
Karong Lunes, Mayo 11, gilaoman nga hisgutan na sa plenaryo sa Kamara ang consolidated impeachment complaint batok kang VP Sara human kini miuswag pinaagi sa sunod-sunod nga mga hearing sa Justice Committee.
