GENERAL SANTOS CITY – Gikumpirma ni Iskak Dipatuan sa Sarangani Bay Protected Seascape nga girekomenda sa Protected Area Management Board (PAMB) ang pagpasang-at ug criminal and administrative charges batuk sa mother company sa cargo vessel nga gikan sa Vietnam human nga misadsad sa baybayon sa may bahin sa Queen Tuna Park miaging semana.
Matud ni Dipatuan, kini human nga nakasabotan nila sa Department of Environment and Natural Resources human sa gipahigayong panagpulong nga pahamtangan ang M/V HTK Energy og P5.562 million human nadaut ang 200 artificial reef domes.
Kahibaluan nga ang maong barko ang mukarga unta ug kopras sa Brgy. Bawing dihang natigayon ang insidente.
Nasayran nga ang artificial reef domes ang 20 metro ang gilay-on gikan sa baybayon sa Queen Tuna Park.
Nagsilbi kining kapuy-an sa nagkadaiyang matang sa isda nga makit-an sa Sarangani Bay, nga kahinumdumang gideklara nga usa ka protected area pinaagi sa Presidential Proclamation 756 nga gi-isyu kaniadtong March 1996.
