Gipahibalo ni Police Regional Office Davao Region (PRO-Davao) Chief, PBGen. Nicolas Torre III nga sa dili madugay mahuman na ang pagpangita kang Pastor Apollo Quiboloy ug uban pang kaubang akusado.
Matod ni Torre, padayon nga nagkagamay ang lugar nga gipuy-an sa nagtago-tago nga pastor tungod kay nasuroy na nila ang ubang bahin sa Kingdom of Jesus Christ Compound.
Nasayran nga moabot sa 30 ka ektarya ang maong luna hinungdan nga dili sayon ang pagpangita ug pagtago ug pagsilbi sa warrant of arrest.
Laing nakapahinay sa pagpangita mao ang kakuwang sa kooperasyon sa mga sakop sa organisasyon sa unang mga adlaw sa ilang pag-abot sa lugar.
Hinuon di pa makasulti si Torre kon kanus-a nila mahuman ang pagsuhid sa lugar nga gituohang nahimutangan ni Quiboloy.
Sa habig sa KOJC, si Atty. Israelito Torreon niingon nga wala didto ang puganteng pastor.
Bisan si Bise Presidente Sara Duterte niingon nga walay klaro ang presensya sa lider sa KOJC sulod sa compound.
