Nagsugod na pag-imbestiga ang Department of Social Welfare and Development (DSWD) kalabut sa report nga adunay pipila opisyal sa gobyerno sa South Cotabato ang nagpahigayon ug raffle draws gamit ang pundo sa gobyerno nga gitagana alang sa financial assistance alang sa mga pamilya nga angay tabangan.
Kini human ang viral post sa opisyal sa barangay nga nagpasalamat sa usa ka pulitiko human midaug ug slot alang sa kontrobersiyal nga Ayuda Para sa Kapos at Kita Program (AKAP).
Matud ni DSWD-12 Regional Director Loreto Cabaya, Jr. nga ila nang giberipika ang social media post dungan sa pasalig nga imbestigahan ang pundo sa gobyerno nga ginagamit sa pamulitika.
Gipahinumduman usab ni Cabaya ang mga local leaders nga ang AKAP ang gidesinyo aron tabangan ang low-income ug minimum-wage earners nga apektado sa taas nga inflation kon pagsaka sa presyo sa mga nag-unang palaliton.
Matud niini ang kwalipikado sa AKAP kinahanglan nga ang nahisgutan apil sa low-income category.
