GENSAN- Gisugdan na sa lokal nga panggamhanan sa General Santos ang partial temporary road closure sa palibot sa Central Public Market aron mapadayon ang pagtukod sa temporaryong relocation site alang sa mga vendor nga kinahanglan ibalhin tungod sa kadaot sa merkado.
Matod ni City Administrator Shandee Llido Pestaño, gihimo ang maong lakang aron mahatagan og igo nga lugar ang mga nagtrabaho sa pagtukod sa temporaryong balhinanan sa mga public market vendors.
Giingon niya nga ang unang giatiman nga bahin mao ang dapit duol sa Phase 1 sa public market, nga mao ang pinakadaot nga bahin sa merkado tungod sa miaging linog.
Samtang nagpadayon ang konstruksyon, nagpabilin pa sa ilang kasamtangang puwesto ang mga vendor sa merkado.
Apan gihangyo na sa City Government ang City Engineering Office nga paspasan ang pagtukod sa relocation site, samtang siguruhon gihapon ang kalig-on ug kalidad sa estruktura.
Target sa mga opisyal nga mahuman ang temporaryong relocation site sulod sa usa ka bulan, aron masugdan na ang hinay-hinay nga pagbalhin sa mga vendor, ilabina ang mga namaligya sa fish section nga mao ang naapektuhan ug giila nga red-tagged area human sa linog
