Walay plano ang gobyerno nga magpatuman og temporaryong pagdili sa pag-import og bugas bisan nagkaduol na ang ting-ani sa humay sa nasud.
Matod ni Agriculture Secretary Francisco Tiu Laurel Jr., magpadayon gihapon ang pag-import sa bugas aron masiguro nga adunay igo nga suplay samtang nangandam ang nasud sa posibleng grabe nga epekto sa El Niño sa ulahing bahin sa 2026.
Gipasabot niya nga kinahanglan adunay igo nga buffer stock aron matubag ang panginahanglan sa bugas gikan sa Disyembre hangtod Abril sa umaabot nga tuig.
Base sa pinakabag-ong datos, milapas na sa 3.3 milyon ka metric tons ang gidaghanon sa imported nga bugas isip kabahin sa pagpangandam alang sa ting-ulan.
Aron matabangan ang mga mag-uuma, andam ang National Food Authority> (NFA) sa pagpalit og hangtod 500,000 metric tons nga lokal nga humay ubos sa gipalapad nga procurement program alang sa wet season.
Gilaan usab sa Department of Agriculture ang ₱20 bilyon nga pondo alang sa pagpalit og lokal nga humay karong tuiga, nga labaw sa doble kumpara sa ₱9 bilyon nga badyet sa miaging tuig.
