GENSAN- Gikumpirma ni City Administrator Shandee Llido Pestaño nga hapit na moabri ang Kolehiyo ng Heneral Santos, nga nahimutang sa luyo sa Acharon Sports Complex, human makadawat og permit to operate gikan sa Commission on Higher Education.
Matod ni Pestaño, ang kanhi training center sa mga magtutudlo gi-renovate ug gihimong kolehiyo aron magsugod sa paghatag og libre ug kalidad nga edukasyon sa mga estudyante sa siyudad. Sa unang tuig sa operasyon, tulo ka kurso ang ilang gi-offer.
Dugang niya, nahuman na ang college entrance examination, ug adunay na usab mga estudyanteng naka-enrol sa tulo ka kurso nga giablihan. Alang sa mga bag-o pa nakahibalo sa programa, giingon ni Pestaño nga pwede pa nilang duawon ang kolehiyo aron mangutana ug mag-aplay, kon aduna pay bakanteng slot.
Sa unang tuig sa operasyon, target sa Kolehiyo sa General Santos ang pagdawat og 200 hangtod 220 ka estudyante, apan mahimo kining mosaka ngadto sa 250 depende sa kapasidad sa eskwelahan. Giingon ni Pestaño nga ilang gipili nga magsugod sa manageable nga gidaghanon sa mga estudyante aron masiguro ang hapsay nga pagpatuman sa programa, uban sa paglaom nga sa umaabot, makaserbisyo na kini sa liboan ka mga estudyante.
Samtang, giklaro usab ni Pestaño nga modawat ang Kolehiyo sa General Santos og mga transferee. Ang mga first-year students gikan sa ubang institusyon mahimong mobalhin, samtang ang mga second-year students o mas taas pa nga gusto mobalhin sa usa sa mga kursong gi-offer sa kolehiyo gipailalom sa evaluation. Kon makapasar sa assessment ug matuman ang mga rekisito, mahimo silang dawaton isip mga estudyante sa bag-ong kolehiyo.
