Mipalag ang China sa gipahamtang nga sanctions sa Estados Unidos pinaagi sa pagpatuman usab og mga kontra-hakbang batok sa pipila ka produkto ug kompanya sa US.
Sa anunsyo sa Ministry of Commerce of the People’s Republic of China, gipahamtangan nila og sanctions ang pipila ka kompanya sa US, lakip ang mga naglihok sa biotechnology ug resource analytics.
Lakip usab sa ilang mga lakang ang paghugot sa export controls alang sa mga drone, pipila sa mga piyesa niini, ug mga teknolohiya nga may kalabutan niini.
Sa kinatibuk-an, unom ka kompanya gikan sa US ang gidugang sa listahan sa mga kontra-hakbang sa China isip balos sa mga aksyon sa Estados Unidos.
Una nang gidid-an sa US ang 43 ka kompanya sa China sa pagsulod sa merkado niini tungod sa alegasyon sa human rights abuses batok sa mga Uyghur ug uban pang minority groups.
Gipatuman ang maong lakang usa ka bulan sa wala pa ang nakatakdang pagbisita ni Xi Jinping sa Estados Unidos sa sunod nga bulan, diin gikatakda siyang makigtagbo kang Donald Trump.
