Gipasiguro sa Department of Transportation o DOTr ang pagpadayon sa rehabilitasyon ug pagpauswag sa General Santos Airport nga gitumong nga moabot sa P250 milyon ang pondo.
Kabahin sa proyekto ang pagpaayo sa terminal aron maandam ang tugpahanan sa posibleng pagdagsa sa mga pasahero panahon sa kapaskohan.
Target nga makompleto ang usa ka bahin sa terminal sa dili pa matapos ang Nobyembre, samtang gilauman nga hingpit nang maandam ang airport pagsugod sa Disyembre.
Apil usab sa mga pagpauswag ang pag-instalar og boarding bridge ug pagpalig-on sa kapasidad sa tugpahanan aron makaserbisyo sa mas dagkong mga eroplano.
Gipahimutang usab ang mas lig-on nga tempered glass sa pipila ka bahin sa terminal aron madugangan ang proteksyon sa mga pasahero ug pasilidad batok sa kusog nga hangin, linog ug uban pang kalamidad.
Gipasiugda ni Department of Transportation Secretary Jovani Lopez ang pagpadayon sa proyekto pinaagi sa koordinasyon tali sa DOTr ug Civil Aviation Authority of the Philippines.
Tumong sa rehabilitasyon nga mapaayo ang serbisyo, seguridad ug kapasidad sa General Santos Airport aron mas makatubag sa nagkadaghang panginahanglan sa mga pasahero ug operasyon sa eroplano sa Rehiyon 12.
