GENSAN – Malipayong gipahibalo ni Mayor Lorelie Pacquiao nga ang National government nagtugot ug naghatag og budget nga P109 milyon alang sa hingpit nga pagkakatapos sa Dr. Jeorge Royeca Hospital. Ang maong pondo magamit aron mahuman ang lima ka andana nga bilding sa ospital.
Sa iyang pahayag, giingon ni Mayor Pacquiao nga kini usa ka dakong kalampusan alang sa syudad ug sa tibuok komunidad, kay mas daghang pasyente ang mahimong matabangan ug mas mapalambo ang kalidad sa serbisyo medikal sa lugar. “Malipayon kaayo kita nga makahatag og mas komprehensibo ug moderno nga serbisyo sa atong mga residente pinaagi sa pagkahuman sa lima ka andana nga bilding sa Dr. Jeorge Royeca Hospital,” matod pa niya.
Ang proyekto, nga giila nga usa sa pinakadakong medical infrastructure initiatives sa syudad, naglakip sa modernong pasilidad, emergency room, ug uban pang departamento nga magahatag og mas episyente ug accessible nga healthcare sa publiko.
Gilauman nga pagkahuman sa proyekto, molambo pa ang kapasidad sa ospital sa pagdawat og mas daghang pasyente ug matubag ang nagkadako nga panginahanglan sa medical services sa Gensan ug sa kasikbit nga mga lugar.
