Gipaabot ang sunod-sunod nga pagnubo sa presyo sa mga produktong petrolyo ug liquefied petroleum gas o LPG sa umaabot nga semana, nga makahatag og kahupayan sa mga konsumidor.
Sugdan kini karong Domingo, diin gilauman ang ₱2 nga rollback sa matag kilo sa LPG. Katumbas kini sa ₱22 nga pagminus sa presyo sa usa ka kasagarang 11-kilogram nga tangke.
Sunod niini, gipaabot usab ang pagnubo sa presyo sa mga produktong petrolyo sa pagsugod sa semana. Gibana-bana nga moubos og ₱2.67 kada litro ang diesel, ₱2.47 ang gasolina ug ₱1.88 ang kerosene, base sa kalihokan sa merkado sa Mean of Platts Singapore o MOPS.
Gituohang hinungdan sa sunod-sunod nga rollback ang hinay nga panginahanglan ug lig-on nga suplay sa petrolyo sa international market.
Apan giklaro sa industriya sa lana nga inisyal pa lamang kini nga pagtantiya ug mahimo pang mausab depende sa opisyal nga pahibalo sa Department of Energy o DOE.











