Gibungkag ni Nepal President Ramchandra Paudel ang ilang parlyamento niini og nagtakda og bag-ong eleksyon sa Marso 5, 2026.
Gihimo ang desisyon human sa usa ka semana nga kagubot nga misangpot sa pagtudlo sa unang babaye nga punong ministro sa nasud.
Sumala sa usa ka pahayag gikan sa opisina ni Paudel kaniadtong Biyernes, gitudlo niini si kanhi Chief Justice Sushila Karki nga manguna sa nasud sa interim nga basehan.
Gitudlo siya human sa mapintas nga mga protesta nga gipangulohan sa usa ka grupo sa mga batan-on nga nailhan nga “Gen Z” nga nagprotesta batok sa korapsyon sa gobyerno.
Diin maoy nakaaghat sa pagluwat ni Kanhi Punong Ministro K.P. Sharma Oli gumikan nigrabe ang tensiyon ug nagbilin og labing menos 51 ka mga tawo ang namatay ug kapin sa 1,300 ang naangol.
Gitudlo si Karki human sa duha ka adlaw nga negosasyon tali ni Presidente Paudel, Army Chief Ashok Raj Sigdel, ug mga lider sa protesta.
Samtang, ang India, ang habagatang silingan sa Nepal, nagpagawas og pahayag, diin naglaum nga ang mga panghitabo magdala na og kalinaw ug kalig-on sa ilang silingan nga nasud.
