Nakig-negosasyon karon ang Estados Unidos sa Denmark may kalabotan sa plano nga palapdon ang presensya sa mga military base niini sa Greenland.
Naamgohan nga tumong sa U.S. nga magtukod og tulo ka bag-ong military base sa habagatang bahin sa Greenland isip pagpangandam sa posibleng aktibidad sa Russia ug China sa North Atlantic region.
Matod pa, aduna nay unang tensyon tali sa Denmark ug U.S. human ipahayag ni U.S. President Donald Trump ang ideya sa pag-angkon sa isla, tungod sa kahadlok nga basin matod pa makuha kini sa Russia ug China. Apan, hugot kining gisupak sa Denmark ug Greenland nga dili nila dawaton ang bisan unsang plano sa pagsakop sa ilang teritoryo.
Bisan pa niini, nagpadayon ang diplomatic talks sa duha ka nasod, ug gikompirma sa Denmark nga adunay ongoing negotiations sila sa Amerika bahin sa posibleng dugang military presence sa Greenland, apan nagdumili sila sa paghatag og dugang detalye.
Giplano nga itukod ang usa sa mga base sa Narsarsuaq, usa ka kasamtangang U.S. military facility nga adunay gamay nga airstrip.
Makatutok usab kini sa maritime surveillance o pagbantay sa lihok sa mga barko ug military activities sa GIUK Gap, usa ka importante nga ruta tali sa Greenland, Iceland, ug United Kingdom.
Sa karon, wala pay pinal nga kasabutan ang duha ka nasod sa maong isyu, ug wala usab apil sa diskusyon ang plano sa U.S. nga kontrolon o sakupon ang Greenland. Sa kasamtangan, usa na lang ka military base sa U.S. ang naa sa Greenland — ang Pituffik Space Base — kumpara sa panahon sa Cold War nga adunay 17 ka pasilidad ang Amerika.
