GENSAN – Gipasabot sa Office of Civil Defense (OCD) nga ang pagpatuman sa 4th Quarter Nationwide Simultaneous Earthquake Drill (NSED) karong Nobyembre 6 alas 9:00 sa buntag usa ka importante nga lakang aron mapaigting ang kahandam sa publiko batok sa kalit nga mga kalamidad sama sa linog ug tsunami.
Sumala ni Jorie Mae Balmediano, tigpamaba sa OCD Region 12, ang maong kalihokan gilaraw aron mahasa ang katawhan ug matudluan unsaon ang hustong pagbuhat kung mahitabo ang linog pinaagi sa praktis ug kooperasyon sa tanang sektor Dugang pa niya nga pinaagi sa kanunay nga earthquake drill maanad ug mahimong alerto ang mga tawo sa panahon sa emerhensya.
Sa Region 12, ipahigayon ang sentrong programa sa Lebak Sultan Kudarat diin makigbahin ang mga ahensya sa gobyerno, lokal nga panggamhanan ug mga estudyante sa pagpraktis sa duck cover and hold ug sa simulation exercise alang sa posibleng epekto sa tsunami.
Gipasalig sa OCD nga ang drill dili lang para sa pormalidad kundili usa ka paalaala nga kinahanglan andam kanunay ang tanan sa bisan unsang panahon aron malikayan ang kadaot ug maprotektahan ang kinabuhi sa mga Pilipino
