Gipahibalo ni US Acting Attorney General Todd Blanche ang tulo ka federal nga kaso nga gisang-at batok sa suspek sa luyo sa pagpamusil sa White House Correspondents’ Dinner sa Washington D.C. niadtong Sabado sa gabii, Abril 25.
Ang suspek, kinsa usa usab ka assassin, giila nga si Cole Tomas Allen, 31 anyos usa ka Master’s degree holder.
Ang mga kaso nga gisang-at batok sa suspek naglakip sa ‘ attempted assassination’ kang US President Donald Trump, nga adunay silot nga tibuok kinabuhi, ug duha ka mga kaso sa ‘firearms offenses’.
Gidetalye usab ni Blanche ang timeline nga misangpot sa insidente sa pagpamusil sa suspek sa miaging semana.
Miingon siya nga niadtong Abril 6, ang suspek nag-book og reservation sa Washington Hilton. Niadtong Abril 21, ang gunman mibiyahe gikan sa Los Angeles paingon sa Chicago sakay sa tren ug dayon mibiyahe gikan sa Chicago paingon sa Washington D.C.
Niadtong Abril 24, ang suspek miabot sa Washington D.C. sa ala 1 sa hapon ug nag-check in sa Washington Hilton.
Niadtong Abril 25, sa dihang nahitabo ang insidente sa pagpamusil, ang gunman miduol sa security checkpoint sa terrace level sa hotel, dayon midagan padulong sa Magnetom nga armado og taas nga pusil ug dinhi ang mga service personnel nga nadestino sa checkpoint nakadungog og kusog nga buto sa pusil, diin usa ka opisyal ang naigo sa dughan apan nabuhi tungod kay nagsul-ob kini og ballistic vest. Napusilan niya ang suspek, kinsa bisan wala maigo, natumba sa yuta ug diha-diha gidakop.
Usa ka semi-automatic handgun, usa ka pump-action shotgun ug tulo ka kutsilyo ang nakumpiska gikan sa suspek.
Samtang, atol sa iyang pag-atubang sa korte sa Washington DC niadtong Lunes, lokal nga oras, ang suspek wala moangkon sa iyang sala.
