GENERAL SANTOS CITY- Dili pa sigurado ang taga Bureau of Fire Protection sa bersyon nga may nakalimtan nga gi-charge nga cellphone hinungdan nga mibuto nga maoy sinugdanan sa kalayo nga gikasunog sa siyam ka panimalay sa Brgy. Lagao ning dakbayan.
Matud ni FO3 Makakuna Tumabiling, arson investigator sa BFP-Gensan nga walay nakit-ang timailhan sa panimalay ni Jacky Capareda nga didto matud pa nagsugod ang kalayo.
Kaganihang buntag mibalik sa lugar si Tumambiling ug gisuhid ang mga balay nga nasunog apan walay nakit-ang ebedinsya nga magtudlo sa gigikanan sa kalayo nga milamoy sa siyam ka balay.
Mukabat sa P150,000.00 ang danyos sa sunog hinungdan nga nawad-an ug kapuy-an ang walo ka pamilya apan nakadawat na matud pa ang mga nasampit og inisyal nga mga panginahanglanon.
