GENSAN- Nagpahayag og pasalamat ang usa ka traysikol driver sa dakbayan sa Gensan human sa rollback sa presyo sa petrolyo nga dako og natabang sa ilang panginabuhi.
Sumala kang Leonard Balaga, nga ang pag-ubos sa presyo sa gasolina nakahatag og kahayahay sa ilang adlaw-adlaw nga pagbyahe ilabina sa pagsaka sa presyo sa mga palaliton.
Matud pa niya, makadugang kini sa ilang kita tungod kay ang kantidad nga ikatubil sa gasolina mahimo nang maadto sa ubang panginahanglan sa panimalay.
Bisan pa niini, iyang giila nga aduna gihapoy kabalaka nga posibleng mosaka pag-usab ang presyo sa petrolyo tungod sa padayon nga tensyon sa Middle East, lakip na ang sitwasyon sa Strait of Hormuz.
Aron makasugakod, ilang ginapili ang mga lugar nga daghan og pasahero aron malikayan ang pag-usik sa gasolina.
Bisan sa mga hagit, mipahayag gihapon si Balaga nga malipayon siya sa kasamtangang rollback tungod sa dako niining tabang sa ilang sektor.
