GENERAL SANTOS CITY – May kaugalingong folder na ang National Bureau of Investigation-Sarangani District Office (NBI-SARDO) alang sa mga complaints kontra sa KAPA Community Ministry International Inc.
Kini human nga gikumpirma sa Bombo Radyo GenSan ni NBI Agent Regner Pineza nga adunay mga complainant na silang nakuha batok sa KAPA nga gipamunuan ni Joel Apolinario.
Mibalibad ang opisyal nga panganlan ang mga reklamante apan sumala pa, ang gustong mahitabo sa mga reklamante nga mabawi ang ilang salapi nga gi-invest sa naasoy’ng grupo.
Sumala pa ni Pineza nga abli ang ilang buhatan sa magreklamo batok KAPA.
Una ng gihingusgan sa KAPA nga dili sila scam apan galaum gihapon ang mga miyembro niini nga mubalik sa normal ang operasyon sa KAPA human nga pipila ka adlaw nang walay ‘pay-out’ human sa closure order ni Pangulong Rodrigo Duterte sugod sa nakabay nga semana.
Gisundan usab kini sa gilayong pag-freeze sa tanang bank accounts ni Apolinario lakip ang mga natumbok nga mga bahandi niini.
Apan nabahad si Atty. Pineza nga ilang sikupon pinaagi sa warrantless arrest ang kinsa man nga malapas ug padayong manawagan aron magbutang og pondo sa KAPA.
Samtang mismo ang Bombo Radyo ang midala sa mga reklamante sa buhatan sa NBI-SARDO human nga midangop sa sibyahanan aron sa pagpangayo og tabang human nga nanirado na ang KAPA.
Sa pagsaysay sa usa ka mananagat nga taga Brgy Bula ning syudad, gibutyag niini gustong magpatabang aron mabawi ang gibutang niini nga P20,000 gawas sa P20,000 sa iyang asawa og P10,000 sa anak.
Giangkon nga nakahukom sa pagduol sa Bombo human nga madunggan sa pagsibya kung unsa ang pwedeng himuon aron mabalik sa mga miyembro sa KAPA ang ilang salapi.
Giangkon nga kaupat naka-pay-out og tag P6,000 kada bulan human nga nag-invest og P20,000, kaduha ka pay-aout ang asawa samtang gipatulog sa ilang anak hangtod Disyembre ang gi-pay in.
Apan naguol sila karon tungod sirado na ang KAPA. Naghandum kini nga mauli ang ilang salapi og i-apil pati ang tubo nga gisaad sa KAPA.
Gibalik-balikan nila ang opisina sa KAPA sa Alabel apan gisultihan lang sila sa mga presidente matud pa sa grupo nga dili mahimong ipadayun ang operasyon sa grupo tungod sila ang dakpon.
Samtang, giangkon sa usa sa reklamante dihang midangop sa Bombo Radyo nga nahibalo siya kung unsa ang madangatan sa gibutang niining salapi sa KAPA.
Matud pa, sa sinugdanan pa lamang kabalo kini nga ‘willing victim’ siya.
Dugang pa niini, kabalo siya nga ilegal ang operasyon sa KAPA tungod walay ensaktong papeles og dokumento nga gihuptan si Joel Apolinario aron mulungtad ang operasyon o dili gukdon sa gobyerno.
Giangkon nga siya mismo ang miadto sa KAPA Office sa Alabel og walay nag-engganyo kaniya. Sa pagtan-aw niini misulod kini sa usa ka sugal ug namasin nga mudaog.
Sa pahayag sa reklamante nga ikalipay niya kung mabalik ang salapi niini nga upat ka bulan na ang nakalabay sugod nga gi-‘pay in’ apan naabtan og sirado sa KAPA. Luyo nga naguol apan giagi na lang niini og katawa ang problema.
Samtang may usa ka lalaki nga anaa sa panagatan ang midangop usab sa Bombo aron mangayo og tabang nga mabalik kaniya ang P100,000. Hinuon ang mga nasampit ang pormal ng nagreklamo sa NBI SARDO human nga gidala sa Bombo.
Samtang, giawhag ni Agent Pineza sa NBI-SARDO ang mga KAPA members nga mudangop sa ilang buhatan alang sa pormal nga pagpasang-at og reklamo alang sa pagpasaka og kaso sa KAPA og dakong tabang usab sa puruhan nga mabalik ang salapi sa mga miyembro.
Matud ni Agent Pineza, angayang madokumento ang mga taong nag-invest aron masayran kung pila gayud ang ilang gibutang nga salapi aron nga ugaling may matigayong pagbalik sa salapi, masayran ang claims sa matag usa.
Giangkon niini, wala nahibalo kung asa maggikan ang ibalik nga salapi apan sa karon naka-freeze na ang mga bank accounts ni Joel Aponalirio sa bangko lakip ang mga propriedad nga panag-iya sa KAPA.
Giklaro ni Pineza nga malabo na nga mahatag pa ang interes/tubo inay ang principal amount na lang sa salapi nga gibutang ang mabalik.
Giawhag ang mga KAPA members nga itago ang mga mga papel sa unsa mang nahimong transaksyon sa KAPA og ALAMCO sama sa certificate of deposits, membership ID og uban pa nga magamit ugaling may pagbalik sa salapi.
Samtang gibutyag ni Pineza nga hugot nga gimonitor si Apolinario luyo sa kakulangon sa mga personahe.
