Human sa mga dekadang paghulat, natapos na ang pagsemento sa mga kalsada sa Purok San Lorenzo sa Barangay Apopong ug sa Barangay City Heights sa General Santos City.
Gipahayag ni City Mayor Lorelie Geronimo Pacquiao nga dakong kalipay nga makita nga sa katapusan mapahimuslan na sa mga residente ang mga kalsada nga dugay na nilang gihulat, ilabina samtang padayon nga nagkadako ug nag-uswag ang mga komunidad.
Matud sa mayor, iyang siguruhon nga ang mga proyekto sa dakbayan husto, gikinahanglan ug nakabase sa kaayohan sa matag Heneral.
Gipasalamat usab ni Pacquiao ang mga taxpayers nga padayon nga nagbayad sa ilang buhis, ug gipasabot nga ang mga koleksyon gikan niini ibalik ngadto sa katawhan pinaagi sa mga serbisyo ug proyekto nga direktang mapuslan sa mga komunidad.
Gilauman nga ang pagkasemento sa mga kalsada makatabang sa pagpalambo sa pagbiyahe ug adlaw-adlaw nga kalihokan sa mga residente sa maong mga lugar.
