GENERAL SANTOS CITY – Padayon gihapon ang panawagan sa liderato sa Police Regional Office 12 (PRO-12) ngadto sa tanang kapulisan sa rehiyon nga nabiktima sa kontrobersyal nga P2 billion Pulis Paluwagan Movement kon PPM, nga magpasang-at ug pormal nga reklamo batok sa mga nagpaluyo niini.
Kini aron maduot ug mapamatud-an ang alegasyon batok sa mga nahisgutan.
Sa pakighinabi sa Bombo Radyo GenSan kang Lt. Col. Aldrin Gonzales sa information office sa PRO-12, gibutyag niini nga napasang-at na sa Regional Investigation and Detective Management Division (RIDMD-12) ngadto sa Prosecutor’s Office ang initial nga pre-affidavit of complaint sa mga nagreklamo batok sa “inner core” kon mga pulis nga nagpaluyo sa naasoy’ng investment scam.
Alang matud pa kadto sa kasong kriminal batok sa mga opisyal sa kapulisan nga nalambigit ug nagpaluyo sa maong scam, ug lain pa ang alang sa atubangon nilang kasong administratibo.
Nasayran nga pipila sa mga opisyal sa kapulisan sa rehiyon ang atua karon sa Personnel Holding & Accounting Unit (PHAU) sa Camp Crame, sama sa kanhing labaw sa General Santos City Police Office kon GSCPO nga si P/Col. Raul Supiter tungod sa kalambigitan niini sa PPM, kung asa nasayran nga sulod mismo sa Camp Fermin G. Lira ginahimo ang mga transaksyon niini.
