DIGOS – Nagpadayag og iyang sientyemento si Silvestre Derecho nga taga San Miguel, Digos, Davao del Sur kabahin sa pagpamusil patay kang Kapitan Oscar “Dodong” Bucol Jr. sa Tres de Mayo, Digos City kagabie.
Sa exclusive interview sa Bombo Radyo Gensan, gibutyag niya nga siya ug ang iyang pamilya nabalaka human giakusahan nga kakunsabo siya sa pagpatay kang Kapitan Bucol.
Gibutyag niya nga miadto siya sa balay sa Kapitan kagabii aron iuli ang pitaka nga nakit-an nila sa iyang asawa.
Naghulat siya og sobra sa usa ka oras sa wala pa moatubang kang Kapitan Dodong ug samtang naghulat, nakigsulti siya sa usa ka tanod sa barangay.
Ug sa dihang miatubang siya sa Kapitan gihatag niya ang pitaka ug ang biktima diha-diha dayon nag-live sa iyang social media account. Sa wala pa ang pagpamusil, wala siyay namatikdan nga bisan unsang kadudahang sakyanan o tawo sa gawas sa balay ni Bucol.
Miingon siya nga bisan niadto managhigala sila sa biktima tungod kay siya ang welder sa iyang mga sakyanan.
Sumala ni Mr. Derecho, kagabii siya ug ang iyang asawa miadto sa mga awtoridad aron klaruhon ug ihimakak nga siya kakunsabo sa krimen.
