Usa ka Swiss nga powerlifter ang nagpakitag dakong pisikal nga paglahutay human magpabiling nalubong sa niyebe sulod sa kapin sa duha ka oras samtang nagsul-ob lamang ug trunks, usa ka pagsulay nga miresulta sa usa ka bag-ong Guinness World Record.
Si Elias Meyer, usa ka atleta nga hanas sa weightlifting, mipili niini nga hagit aron pagrekord sa world record title “longest time spent in direct full body contact with snow.” Matod niya, iyang nahibaw-an nga wala pay nakatala og duha ka oras sa maong titulo kaniadto mao nga iya kining gisulayan.
Nakatala siya og duha ka oras ug pito ka segundos, milabaw sa miaging rekord nga gihuptan ni Valerjan Romanvoski niadtong 2022, nga milungtad og usa ka oras, 45 minutos ug 2 segundos.
Bisan og grabe ang katugnaw, giangkon ni Meyer nga mas nakigbisog siya sa kabug-at sa niyebe sa iyang lawas kaysa sa katugnaw mismo.
