GENERAL SANTOS CITY – Selos ang gitudlong rason hinungdan nga gidunggab-patay sa usa ka laborer ang iyang kapuyo sa gawas sa gitrabahuan niining videoke bar kagabii, sa Ardonia St. Brgy Lagao ning siyudad.
Giila ang biktima nga si Lyka Solibio, 22-anyos, taga-Alabel, Sarangani, samtang ang suspek nga iyang ka-live mao si Arnel Marquez, 27-anyos, taga-Lower Labay Brgy Tinagacan ning dakbayan.
Gideklarang dead on arrival ang biktima sa balay-tambalanan, gumikan sa naangkon nga samad-dinunggaban sa dughan, ilok, liog ug likod.
Angol usab ang duha ka kauban sa biktima human gisulayan ug ulang ang duha.
Sa imbestigasyon, miabot ang suspek sa naasoy’ng bar, kung asa midagan matud pa pasulod ang biktima, apan gigukod sa suspek ug gidala pagawas.
Nag-istoryahanay matud pa ang duruha, dihang kalit na lamang midagan pabalik sa sulod ang biktima nga may samad-dinunggaban na sa dughan.
Gisundan kini sa suspek ug subling gidunggab sa makapila ka higayon ang kapuyo.
Gilayong nasikop sa mga mirespondeng kapulisan ang suspek, nga giangkon nga midulom ang panan-aw, dihang nakita nga mibalik sa iyag trabaho sa videoke bar ang ka-live in.
Ang naasoy’ng insidente ang gikonsiderang crime of passion sa kapulisan gumikan gikalambigitan sa duha ka tawo nga nagmahalay.
