GENSAN- Naghangyo si General Santos City Councilor Richard Atendido sa mga vendor sa Central Public Market nga masabtan ug suportahan ang mga development nga ginapatuman sa lokal nga panggamhanan alang sa pagpalambo sa palengke.
Matud ni Atendido, nasabtan sa lokal nga panggamhanan nga ang mga vendor mahimong makasinati og kahasol ug maapektuhan ang ilang naandan nga pagpanginabuhi tungod sa mga pagbalhin, relokasyon ug uban pang kausaban nga may kalabotan sa development sa palengke sa dakbayan.
Apan iyang gipadayag nga temporaryo lamang ang maong kahasol ug gikinahanglan ang lig-on nga kooperasyon sa mga vendor aron makab-ot ang mas hapsay, limpyo ug mas nindot nga Central Public Market nga mas makabenepisyo sa kadaghanan.
Gihangyo ni Atendido ang mga vendor nga makigtambayayong sa lokal nga panggamhanan ug sabton nga ang mga lakang nga ginapatuman karon dili lamang alang sa gobyerno, kundili alang usab sa kaayohan sa mga namaligya ug sa tibuok komunidad.
Dugang pa sa konsehal, padayon ang pagpangita sa LGU og mga pamaagi aron mapalambo ang Central Public Market, ug gilauman nga sa higayon nga magsugod na ang operasyon niini, mas komportable ug mas malipayon ang mga vendor, mamalitay ug tibuok katawhan sa Gensan.
