GENERAL SANTOS CITY – Nagpadayon ang ginahimong imbestigasyon sa mga otoridad sa natigayong pagpang-harass sa Bombo Radyo GenSan.
Kini human nga gipaulanan sa mga bala sa puysil sa wala pa mailhing mga suspek nga sakay sa pula nga pick-up ang Bombo Radyo Gensan Broadcast Center pasado alas-8:30 kagabie.
Sa naasoyng oras nag-programa si Bombo Jojo Bacalanmo sa anchor’s booth kung asa gihisgutan niini ang kabahin sa KAPA samtang on-duty usab sa newsroom si Bombo Boy Galano.
Nabuak ang glass door sa sibyahanan kung asa ang bala ang milapos sa samin sa recording room og maayo na lamang nga walay nag-record sa maong orasa.
Narekober sa taga SOCO sa recording room ang usa ka deformed slug sa 9mm pistol samtang adunay unom ka empty shell sa .45 caliber pistol ang nakit-an atubangan sa istasyon.
Pagtuo ni Bombo Jonathan “Janjan” Macailing nga ang panghitabo adunay dakong kalabutan sa init nga paghisgot sa sibyahanan sa pagpasirado sa Kabus Padatuon ni Pastor Joel Apolinario.
Giangkon usab sa station manager sa Bombo Radyo GenSan nga una niini, adunay nadawat na kining mga bahad sa iyang kinabuhi ug bisan sa pipila ka empleyado sa istasyon.
Kahinumduman nga naka-return fire ang duha ka security personnel sa sibyahanan sa mga suspek apan paspas nga nakasibat ang mga nasampit sakay sa pick-up.
Luwas usab ang tanan sa mga empleyado sa Bombo Radyo Gensan og luyo sa panghitabo, mubarog gihapon sa kamatuoran.
