GENSAN- Lakip ang Bombo Radyo Gensan sa gihimong aerial inspection sa Philippine Coast Guard sa mga coastal areas sa Sarangani Province ug General Santos City kaganihang hapon, usa ka adlaw human sa kusog nga Magnitude 7.8 nga linog nga miigo sa rehiyon.
Sakay sa usa ka chopper, giinspeksyon sa Coast Guard ug uban pang mga otoridad ang kadak-on sa kadaot nga gibunga sa linog sa pipila ka bahin sa SOCCSKSARGEN.
Unang gituyok sa team ang General Santos City diin nakita ang pipila ka nagubang mga building, lakip na ang usa ka commercial building sa Barangay Calumpang diin hangtod karon nagpadayon pa ang search and retrieval operations.
Sumala sa mga otoridad, duha pa ka indibidwal ang gituohang natabunan sa maong building.
Midiretso usab ang inspection team sa Watergran Resort diin nagpadayon ang search and rescue operations alang sa pipila ka nataho nga missing persons.
Human niini, naghimo usab og aerial inspection ang grupo sa nagkadaiyang lungsod sa Sarangani Province lakip ang Maasim, Glan, Malapatan, ug Alabel sa wala pa mibalik sa General Santos City.
Sa gihimong pag-inspeksyon, klaro kaayo ang grabeng kadaot sa pipila ka mga kalsada ug imprastraktura ilabina sa Glan, Sarangani diin adunay mga dalan nga hangtod karon dili pa maagian tungod sa mga nagun-ob nga tulay ug landslide mahitungod sa linog.
Padayon usab ang assessment ug relief operations sa mga ahensya sa gobyerno samtang nagpadayon gihapon ang clearing operations sa mga apektadong lugar.
