Gimando ni Philippine Red Cross Chairman ug CEO Richard Gordon ang daliang pag-deploy sa mga satellite phone, communication units, generator, hot meals, ug food packs ngadto sa mga komunidad nga naapektuhan sa magnitude 7.8 nga linog sa General Santos ug Sarangani.
Tumong sa maong lakang nga maabot ang mga lugar nga temporaryong na-isolate tungod sa naguba nga mga tulay ug kalsada. Lakip sa mga apektadong ruta ang Aquino Bridge sa Glan ug Sapumasla Bridge sa Malapatan nga parehong nadaot human sa linog, hinungdan nga lisod ang pagsulod sa ayuda sa pipila ka mga barangay sa Sarangani Province.
Sumala ni Gordon, nakadawat ang PRC og report gikan sa RC 143 volunteers nga adunay mga komunidad nga dili na maagian, mao nga iyang gipasalig nga “ang tabang moabot ra gihapon.”
Magdala ang PRC og food packs, water filtration systems, satellite communication, ug uban pang importanteng gamit aron matabangan ang mga residente, samtang gamiton usab ang ilang logistics trucks ug emergency response assets aron maabot ang mga nanginahanglan.
Padayon usab ang koordinasyon sa PRC sa mga lokal nga gobyerno ug partner agencies aron mabalik ang mga kritikal nga serbisyo sama sa tubig, kuryente, ug komunikasyon.
