SARANGANI- Dili pa maagian hangtud karun sa mga sakyanan ang dalan gikan sa General Santos City paingon sa Glan, Sarangani Province.
Sumala ni Rodrigo Sosmeña, Regional Director sa Office of the Civil Defense (OCD) 12, kini tungod sa nagubang tulay.
Sa iyang pahayag, kung bahin sa casualties ang hisgutan, ang Sarangani maoy labing grabeng naapektuhan tungod dinhi natala ang pinakadaghan nga namatay.
Kini resulta sa mga landslide ug nagubang mga dalan.
Samtang, giingon ni Glan Mayor Victor James Yap Sr. sa Bombo Radyo GenSan nga daghan pa gihapon ang missing persons nga padayon pang gipangita karon.
Matod pa ni Sosmeña, tungod kay dili pa passable ang dalan gikan GenSan ngadto sa Glan, ang mga relief goods ug uban pang mga panginahanglanon gidala pinaagi sa chopper.
Dugang niya nga base sa iyang koordinasyon sa Department of Public Works and Highways, mokabat pa og usa ka semana hangtod mahimong maagian pag-usab ang nagubang tulay.
