Gikansela ang face-to-face classes sa usa ka tulunghaan sa San Carlos City, Negros Occidental dili tungod sa dautang panahon kon dili tungod sa dakong bitin nga gikahadlokang makahilo nga nakita sa gawas sa classroom.
Usa ka video sa cellphone ang gipakita asa ang bitin nga migawas gikan sa bangag nga daw nagtan-aw sa palibot.
Matod sa magtutudlo nga si Mica Mascarinas, ang mga tinun-an maoy unang nakakita sa bitin, ug iyang giangkon nga nabalaka sila tungod sa nakitang bitin.
Gipahibalo hinuon sa tagdumala sa nahisgutang elementarya nga unang higayon pa lang nila nga nakakita sa maong bitin. Gipahibalo dayon nila ang mga ginikanan sa insidente ug gisuspenso ang klase.
Ang City Disaster Risk Reduction and Management Office mihimo dayon og inspeksyon sa maong tulunghaan, ug base sa video, ang dagway sa bitin giingong duol sa makahilong Philippine king cobra.
