GENSAN – Giawhag ni Dr. Lalaine Calonzo sa City Health Office ang katawhan nga aduna pay laing mga paagi sa pagsaulog sa holiday season ning bulana nga dili lamang ang paggamit og pabuto aron mahimong malipayon ang selebrasyon.
Matod niya, daghang alternatibong pamaagi nga luwas ug epektibo sa paghimo og kasadya sama sa paggamit og torotot, mga gamit sa kusina nga mahimong pangpasaba, ug bisan ang pagpaandar sa motorsiklo sa hustong lugar ug oras.
Pinaagi niini, dili lamang malingaw ang katawhan apan malikayan usab ang mga disgrasya sama sa samad ug sunog nga kasagaran nga mahitabo tungod sa pabuto.
Dugang pa ni Dr. Calonzo, nga mas maayong iprioridad ang kahimsog ug kaluwasan sa matag pamilya aron mas matin-aw ug hapsay nga masaulog ang Kapaskuhan ug ang umaabot nga Bag-ong Tuig.
