GENERAL SANTOS CITY – Dili magduha-duha ang kapulisan sa Pendatun Police Station nga magpasaka ug kaso oras nga sila masayod kung kinsa ang nagbilin sa granada sa likod sa usa ka pick up kagahapon sa may Roxas Avenue, Barangay Dadiangas East ning dakbayan.
Matod kang Pmaj. Wesley Matillano, hepe sa maong istasyon, padayon sila sa imbestigasyon kung ngano nakaabot ang hand grenade nga gihikot sa wire ug gibalutan ug masking tape sa likod sa pick up nga gipanag-iyahan ni Omar Sabinola Abing, 29 anyos, ug residente sa Agan Homes Block 13 Lot 5, Barangay Ligaya ning siyudad.
Ilaha usab paga-subayon ang mga area nga naadtuan sa pick up ayha pa nasayran nga adunay granada sa likod niini.
Posible usab nga ilang pangayuon ang CCTV footage sa palibot kung anaa may naka-install sa dalan. Kasong illegal possession of explosives ang ipasaka sa suspek oras nga mapamatud-an sa kapulisan ang kalambigitan niini.
Gipunto usab sa opisyal nga mas maayo nga alerto ang katawhan sa mga kadudahang bagahe kon gamit aron nga walay mahayay nga mahitabo sa bahin sa kapulisan inkaso nga ang mga unod niini mga bomba.
Dugang pa niya, mandato ni PCol Nicomedes Olaivar Jr., City Director sa GSCPO, nga aksyunan ang maski unsa nga report gikan sa katawhan aron malikayan ang mga di maayong panghitabo.
