MAASIM, SARANGANI PROVINCE– Giandam na ang mga kasong ipasaka batok sa suspek nga nadakpan human nga nakumpiska ang kapin sa tunga sa milyon ka pesos nga kantidad sa smuggled nga sigarilyo nga naharang sa COMELEC checkpoint sa Sitio Seguil, Barangay Tinoto, Maasim, Sarangani Province.
Giila sa Maasim Municipal Police Station ang suspek nga si alyas Sun, 32-anyos, minyo nga taga Purok 6, Barangay Glamang, Polomolok, South Cotabato.
Mag-atubang kini sa kasong kalapasan sa RA 10643 (Graphic Health Warning Law), RA 10845 (Anti-Smuggling Act), ug RA 12022 o (ang Anti Agricultural Economic Sabotage Act.).
Sakay ang suspek sa usa ka Nissan Terra diin karga niini ang 13 ka mga kahon sa canon cigarettes nga mubalor sa P510,770.
Sa kasamtangan balhog na ang maong suspek sa nasampit nga Police Station.
