GENSAN-Nagpaabot ang publiko sa mga konkretong aksyon gikan sa gobyerno aron maprotektahan ang mga konsumedor sa posible nga krisis sa lana tungod sa padayon nga kagubot sa Middle East.
Matod ni Professor Mario Aguja sa Mindanao State University(MSU)Gensan, ang Pilipinas nga nagdepende sa mga oil producing countries ang apektado sa gyera tali sa Iran og Israel.
Tungod sa padayong baylonaay ug airstrikes sa maong duha ka nasod misaka na usab ang presyo sa lana sa nasod.
Sa pamahayag ni Prof. Aguja, usa sa mga rason niini tungod apektado usab ang suplay nga moagi sa Strait of Hormuz, usa sa pinakaimportanteng agianan sa lana sa kalibutan.
Tungod niini, gilauman nga mosaka usab ang presyo sa gasolina, diesel, ug LPG sa Pilipinas sa umaabot nga mga semana kung magpadayon pa ang gubot.
