Nagtuo ang tigpamaba sa Philippine Navy alang sa West Philippine Sea (WPS) Rear Admiral Roy Vincent Trinidad nga ang mga insidente sa bangga-anay mahimong mausab ug magpadayon ang “illegal, coercive, aggressive and deceptive (ICAD) nga mga aksyon sa China.
Matod sa opisyal sa PH Navy, sukad nagsugod ang ilegal nga presensya sa People’s Liberation Army (PLA) Navy, ang ilang mga ilegal ug agresibong aksyon maoy hinungdan sa kabalaka.
Matod niya, samtang nagpadayon ang China sa paghimo og ilegal nga kalihokan ug presensya, dili imposible nga mahitabo na usab ang insidente nga nahitabo kaniadtong Lunes, Agosto 11, diin ang barkong iggugubat sa China Navy nabangga sa barko sa China Coast Guard samtang naggukod sa barko sa PCG, ang BRP Suluan, duol sa Scarborough Shoal nga nagmisyon unta sa paghatod sa mga suplay sa mga mananagat nga Pilipino.
Matod ni Rear Admiral Trinidad, dili kini ang unang higayon nga adunay People’s Liberation Army Navy warship nga nanghilabot sa pagpanghasi sa mga barko sa Pilipinas sa WPS.
Siya usab miingon nga ang mga barkong iggugubat sa China sa PLAN naghimo ug mapugsanon ug agresibo nga mga aksyon sa WPS sa milabay nga 20 ka tuig o labaw pa.
Bisan pa niini, ang opisyal sa PH Navy miingon nga ang tanang aksyon sa Armed Forces of the Philippines kanunay nga nagsunod sa international law.
Si Rear Adm Trinidad nanghinaot nga ang insidente kaniadtong Lunes magsilbi nga pasidaan sa tanang players sa maritime domain sa pagpugong ug pagsiguro nga ang ilang mga aksyon nasubay sa mga probisyon sa UN Convention on the Law of the Sea (UNCLOS), Collision regulations, ug uban pa aron malikayan ang mga engkwentro sa kadagatan.
