GENSAN- Gibutyag ni Atty. Luiz Salazar nga lisod mapamatud-an nga adunay igong unod ang impeachment complaint nga giandam batok kang President Ferdinand “Bongbong” Marcos Jr. kalabot sa isyu nga iyang giingong pagpadakop kay kanhi Pangulong Rodrigo Duterte ngadto sa International Criminal Court ug pagdala kaniya sa The Hague, Netherlands.
Matud ni Atty. Salazar, adunay daghang legal nga pangutana nga naglibot sa maong reklamo, ilabi na kon unsay lig-on nga basihanan aron masulod kini sa usa ka balidong kaso sa impeachment.
Gipasabot sa abogado nga kasagaran sa mga reklamo sa impeachment nagasukip sa “betrayal of public trust” isip bug-at nga rason, apan sa kasamtangang kahimtang, dili kini sayon ipatapot sa Pangulo.
Dugang pa ni Atty. Salazar, bisan pa man sa mga alegasyon nga sumala pa adik ang pangulo, lisod gihapon kaayo kini mapamatud-an tungod kay nagkinahanglan kini og lig-on ug substantive nga ebidensiya.
Matud pa ni Atty. Salazar, kon walay klaro, lig-on ug mapamatud-an nga ebidensiya, magpabiling mahuyang ang bisan unsang impeachment complaint batok sa presidente.
