Mipadayon karong Martes, Nobyembre 10, 2026, ang impeachment trial ni Vice President Sara Duterte sa Senado, nga misulod na sa ika-41 nga adlaw sa pagtaral.
Gikumpirma ang quorum human makatambong ang 13 ka senator-judge, samtang gipangulohan ni Senator-Judge Bam Aquino ang pag-ampo.
Gipaatubang sa defense team ang ilang ikaduhang testigo nga si Island Garden City of Samal Assessor Engr. John Kenneth Enumerables aron motestigo kabahin sa propiedad nga gilambigit sa Bise Presidente ug sa iyang bana nga si Atty. Manases Carpio.
Tumong sa depensa nga pamatud-an nga dili tinuod ang alegasyon sa prosekusyon nga wala madeklara o sayop ang pagdeklara ni VP Duterte sa maong propiedad sa Samal, Davao del Norte, sa iyang Statement of Assets, Liabilities, and Net Worth o SALN.
Misunod kini sa pag-atubang kagahapon sa unang testigo sa depensa nga si Davao City Assessor Engr. Jaime G. Adalin, nga gisaway sa pipila ka senador tungod sa iyang dili klarong mga tubag sa pipila ka pangutana atol sa pagdungog.
Tungod niini, gipangutana ni Senator-Judge Vicente Sotto III si Presiding Officer Francis “Chiz” Escudero kon unsay silot nga mahimong ipahamtang sa mga testigong mamakak atubangan sa impeachment court.
Giklaro ni Escudero nga mahimong pasakaan og contempt ang bisan kinsang testigo nga molikay sa pagtubag o tinuyo nga mamakak, gawas pa sa posibleng pag-atubang og kasong perjury kon mapasaka kini sa regular nga korte.
