Giinsister ni Senador Kiko Pangilinan nga ang katawhan ang adunay dakong papel sa pagdesisyon kung kinsa ang angay modagan sa eleksyon sa 2028, human mipahibalo si Bise Presidente Leni Robredo nga dili siya mokandidato sa nasudnong posisyon sa sunod nga piniliay.
Sa iyang pahayag, gitandi ni Pangilinan ang kahimtang ni Robredo sa pagdagan ni kanhi Presidente Benigno “Noynoy” Aquino III niadtong 2010, nga sa sinugdanan midumili usab sa pagdagan sa pagkapresidente bisan pa sa panawagan sa publiko.
Matud ni Pangilinan, sa kataposan, milabaw ang panawagan sa katawhan maong nakadesisyon si Aquino nga mokandidato sa pagkapresidente.
Nagtuo usab ang senador nga ang katawhan gihapon ang mahimong magbuot sa dagan sa eleksyon sa 2028, pinaagi sa hiniusang lihok ug baroganan sa mga lumulupyo sa nagkalain-laing bahin sa nasud, lakip na sa mga nagpuyo sa gawas sa nasud.
Gihatagan usab niya og gibug-aton nga dili lamang usa ka tawo o gamay nga grupo ang adunay gahom sa paghulma sa direksyon sa nasud, kondili ang hiniusang lihok sa katawhan.
