Mahimong moisyu og dugang warrant of arrest ang International Criminal Court (ICC) batok sa kauban ni kanhi Presidente Rodrigo Duterte kalabot sa mga pagpamatay sa war on drugs sa iyang administrasyon.
Matod sa abogado sa mga pamilya sa mga biktima sa drug war nga si Atty. Joel Butuyan, adunay mga timailhan nga adunay laing tawo gawas sa kanhi Presidente nga posibleng mahatagan og warrant of arrest base sa warrant nga gisilbi kang Duterte gikan sa International Criminal Court.
Diin, ang warrant nag-ingon nga si kanhi Pangulong Duterte usa ka indirect co-perpetrator.
Ang abogado, kinsa naa usab sa listahan sa abogado sa ICC, niingon usab nga ang kanhi hepe sa Philippine National Police (PNP) ug karon Senador Ronald Dela Rosa mahimong usa sa mga co-perpetrator nga mahimong mahatagan og warrant of arrest sa umaabot nga mga adlaw.
Samtang, gipaabot usab nga daghang mga Pilipino ang moadto sa ICC aron motestigo kalabot sa kaso batok sa kanhi Presidente.
