Nagpadayon ang hugot nga pagmonitor sa mga awtoridad sa Central Public Market aron masiguro nga hapsay ang dagan sa trapiko ug dili na makabalik ang mga sidewalk vendor nga naglapas sa mga gilatid nga lugar sa pagpamaligya.
Sumala kang Market Supervisor Paulito Maquilang, gipakusog ang pagmonitor isip tubag sa nagkadaghang reklamo gikan sa mga drayber ug mga commuter. Matud pa niya, ang pag-okupa sa pipila ka mga sidewalk vendor sa mga access road ug daplin sa kalsada maoy hinungdan sa paghuot sa trapiko ug pagpameligro sa kaluwasan sa mga naggamit sa dalan.
Aron mapadayon ang kahapsay sa dagan sa mga sakyanan ug mga pedestrian, nagdeploy ang merkado og mga enforcement officers nga maoy magbantay sa maong mga lugar ug mosiguro nga dili na usab masakop ang mga kalsada ug sidewalk sa mga nagbaligya.
Gipasabot usab ni Maquilang nga ang maong lakang nagtumong sa pagmintinar sa kahapsay ug kaluwasan sa palibot sa pampublikong merkado, samtang ginatimbang usab ang interes sa mga negosyante, drayber, ug sa nagkalain-laing katawhang naggamit sa maong lugar.
